Hierdie webwerf vertel die verhaal van Simon van Wyk. Simon was ’n gewone seun wat in Roodepoort grootgeword het met twee ouer broers (Wouter en Abrie) en ’n tweelingsussie (Laetitia). Simon was lewenslustig en vrolik, en was gans en al versot op krieket. Hy was briljant met syfers – hy kon al voordat hy skool toe is enige twee dubbelsyfergetalle in sy kop optel of aftrek. Hy het op skool uitstekend gepresteer en was ’n fantastiese skaakspeler – hy het van onder 10 tot onder 14 elke jaar vir Gauteng Juniors se A-span skaakgespeel, en drie keer onder die top 10 in die land geëindig. Hy het ’n bietjie gesing en kitaar en klavier geleer ook, maar die groot passie in sy lewe was krieket. En toe wou hy so graag saam met die res van sy familie begin fietsry, maar dit kon nooit heeltemal realiseer nie.

Simon se lewe het ’n dramatiese wending gemaak twintig dae voor sy twaalfde verjaarsdag. Op Vrydag 6 Februarie 2004 is Simon met Akute Limfoblastiese Leukemie (’n soort bloedkanker) gediagnoseer. Hy is suksesvol behandel, en in September 2004 het die beenmurgtoets gewys dat hy in remissie is. Met die eerste jaarlikse beenmurgtoets op 26 September 2005 moes ons almal met ’n skok hoor dat die kanker terug is, en toe het sy tweede intensiewe behandeling begin. Hy het uiteindelik (in Junie 2006) ook ’n beenmurgoorplanting ondergaan, maar die kanker het ’n weerstand teen die chemoterapie opgebou. Op Maandag 28 Augustus 2006 is hy op die ouderdom van 14 jaar in sy ouerhuis oorlede.

Hierdie webwerf is ’n geskenk. Vir Simon se familie, maar ook vir al die ander families wat dieselfde vrees en hartseer moet deurgaan. Ons hoop dat hierdie webwerf ook ’n geskenk sal wees vir elkeen wat dit lees – ’n geskenk wat mense meer kan vertel van leukemie en wat dit prakties vir die sieke en sy geliefdes inhou, en ’n geskenk vir elkeen wat hieruit leer hoe om mense wat met hierdie wrede siekte worstel, by te staan. Hou vas aan die hoop op herstel en lewe, en hou vas aan die hoop op die ewige lewe!

Die verhaal van Simon se siekte en sy familie se stryd word in die Dagboek vertel. Die blad getitel Leukemie vertel ’n bietjie meer van die siekte, en hoe ’n beenmurgoorplanting kan help. Skakels gee kontakinligting van organisasies wat kan help, terwyl Foto’s en Kontak jou by Simon en sy familie uitbring.

Baie dankie aan Deon van der Westhuizen van WebWagon wat hierdie bladsy steeds vir Simon se familie, en elkeen wat daarby kan baat, in stand hou.

Druk Ctrl + F5 (Windows Explorer) om te verseker dat u die nuutste weergawe van die blad sien.

Die belangrikste teksvers vir Simon: Fil. 1:21

Simon het aan die volgende woorde vasgehou: “… om te lewe, is vir my Christus, en om te sterwe, is vir my wins.”